༈ ཆེ་བ་དྲུག་ལྡན་དཔལ་གསང་ཆེན་སྔ་འགྱུར་བའི་ཆོས་ཀྱི་བྱུང་བ་མདོ་ཙམ་བརྗོད་པ།

 

༄༅། །སྔ་འགྱུར་སྤྱིའི་བྱུང་བ་བརྗོད་པ་ལ་དང་པོ། ཆེ་བ་དྲུག་ལྡན་དཔལ་གསང་ཆེན་སྔ་འགྱུར་བའི་ཆོས་ཀྱི་བྱུང་བ་ནི།  དེ་ཡང་། རྒྱུད་ཉི་ཟླ་ཁ་སྦྱོར་ལས། ལོ་རྒྱུས་དོན་གྱིས་མ་བཤད་ན། །གསང་ཆེན་ངེས་པའི་བཀའ་འདི་ལ། །ཡིད་མི་ཆེས་པའི་སྐྱོན་དུ་འགྱུར། །ཞེས་པའི་སྐྱོན་ལས་གྲོལ་བའི་ཆེད་འདིར་གསང་ཆེན་སྔ་འགྱུར་བའི་ཆོས་ཀྱི་བྱུང་བ་མདོ་ཙམ་བརྗོད་ན། འདི་ལྟར། བདག་ཅག་གི་སྟོན་པ་ཡང་དག་པར་རྫོགས་པའི་སངས་རྒྱས་རྒྱལ་བུ་གཞོན་ནུ་དོན་གྲུབ་གང་དེས་དང་པོ་བྱང་ཆུབ་མཆོག་ཏུ་ཐུགས་བསྐྱེད། བར་དུ་བསྐལ་ཆེན་གྲངས་མེད་གསུམ་དུ་ཚོགས་བསགས། མཐར་མངོན་པར་རྫོགས་པར་སངས་རྒྱས་ཏེ། གདུལ་བྱའི་ཁམས་དབང་བསམ་པ་དང་། མཐུན་པར་ཆོས་འཁོར་རིམ་པ་གསུམ་དུ་བསྐོར་ནས། རིགས་ཅན་གསུམ་གྱི་གདུལ་བྱ་རྣམས་སྨིན་གྲོལ་གྱི་ལམ་ལ་འགོད་པར་མཛད།

 

 ཀུན་བྱེད་རྒྱལ་པོའི་རྒྱུད་ལས། དུག་གསུམ་ཆ་མཉམ་འདུལ་བའི་གཉེན་པོ་རུ། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །ཞེས་པ་ལྟར། ཉོན་མོངས་དུག་གསུམ་ཆ་མཉམ་པ་གདུལ་བྱེད་ཀྱི་གཉེན་པོར་གསུངས་པའི་རིག་འཛིན་སྔགས་ཀྱི་སྡེ་སྣོད་འདི་ཉིད་ལ་ཐུན་མོང་དུ་རྒྱུད་སྡེ་བཞིའམ་དྲུག ཐུན་མོང་མ་ཡིན་པ་སྔགས་རྙིང་མའི་ཕ་ཆོས་ནང་རྒྱུད་སྡེ་གསུམ་ཞེས། རྡོ་རྗེ་ཐེག་པའི་རྒྱུད་སྡེ་རྒྱ་མཚོ་ལྟ་བུའི་དགོངས་པའི་མཐིལ། མན་ངག་གི་གནད། ངེས་པའི་དོན། རྒྱལ་བ་ཡོངས་ཀྱི་དགོངས་པའི་ཞེ་ཕུགས་དམ་པར་གྱུར་པའི་དམ་པའ་ིཆོས་འདི་ཉིད་ནི། གཞི་གདོད་མའི་སངས་རྒྱས་ཀུན་ཏུ་བཟང་པོ་སྐུ་དང་ཡེ་ཤེས་འདུ་འབྲལ་མེད་པའི་ངང་ནས། སྟོན་འཁོར་དགོངས་པ་གཉིས་སུ་མེད་པ། ལྷུན་གྲུབ་འོད་གསལ་རྫོགས་པ་ཆེན་པོའི་ངང་ལས་མ་གཡོས་བཞིན་དུ། རང་སྣང་ལོངས་སྤྱོད་རྫོགས་པའི་སྐུར་རང་ཤར་ཏེ།  རིགས་ལྔ་ཞི་ཁྲོའི་དཀྱིལ་འཁོར་གྱི་ཚོམ་བུ་གྲངས་མེད་པ་སྣ་ཚོགས་སུ་ཤར་བ་ངེས་པ་ལྔ་ལྡན་གྱི་ཚུལ་དུ་བཞུགས་པའི་རྩལ་ལས། ཆུ་ཟླའི་ཚུལ་དུ་སྤྲུལ་པ་མངོན་པར་སྣང་སྟེ། ཕྱི་ལྟར་ན་ཤཱཀྱ་ཐུབ་པ། ནང་ལྟར་ན་རྡོ་རྗེ་འཆང་། གསང་བ་ལྟར་ན་སྟོན་པ་ཀུན་ཏུ་བཟང་པོ་ལས་དགོངས་པ་གཏད་པའི་སྒོ་ནས་བརྒྱུད་པ་དང་། བརྡ་ཐབས་ཀྱི་སྒོ་ནས་བརྒྱུད་པ། རྣ་བ་གཅིག་ནས་གཅིག་ཏུ་བརྒྱུད་དེ་དབུས་འགྱུར་ཆོས་ཀྱི་ཞིང་དུ་སྐལ་བ་དང་ལྡན་པའི་གདུལ་བྱ་རྣམས་ཀྱི་སྤྱོད་ཡུལ་དུ་གྱུར་པ་ལས་གང་རུང་རུང་ཀུན་གྱི་ཡུལ་དུ་མ་གྱུར་ཅིང་། སྣོད་ལྡན་གྱི་སློབ་མ་རྣམས་ཀྱིས་སྒྲུབ་པ་ཚུལ་བཞིན་དུ་མཛད་པས། འཇའ་ལུས་སུ་དེངས་པ་སོགས་ཐུན་མོང་དང་ཐུན་མོང་མིན་པའི་གྲུབ་པའི་རྟགས་མཚན་ལ་མངའ་དབང་འབྱོར་བ་ཤ་སྟག་བྱུང་།

 

 ཆོས་རྗེ་རོང་ཟོམ་ཆེན་པོའི་ཞལ་རྒྱུན་ལྟར་ན། སྔ་འགྱུར་བའི་ཆོས་འདི་ལ་ཁྱད་ཆོས་ཆེ་བ་དྲུག་ལྡན་དུ་གསུངས་ཏེ། སྤྱན་འདྲེན་པ་པོ་ཡོན་བདག་གི་ཆེ་བ། གང་དུ་བསྒྱུར་ཅིང་གཏན་ལ་ཕབ་པའི་གནས་ཀྱི་ཆེ་བ། སྒྱུར་བྱེད་ལོ་ཙཱ་བའི་ཆེ་བ། མཁས་པ་པཎྜིཏའི་ཆེ་བ། ཞུ་རྟེན་མེ་ཏོག་གི་ཆེ་བ། བསྒྱུར་བྱའི་ཆོས་ཀྱི་ཆེ་བ་སྟེ་ཆེ་བ་དྲུག་གིས་མངོན་པར་འཕགས་པའི་བསྟན་པ་འདི་ཉིད་བོད་ཆེན་པོའི་ལྗོངས་སུ་མཁན་སློབ་ཆོས་གསུམ་གྱི་ཐུགས་བསྐྱེད་བཀའ་དྲིན་ལས་བསྟན་པའི་སྲོལ་ཚུགས་ཤིང་། སྡེ་སྣོད་གསུམ་དང་གསང་སྔགས་ཀྱི་ཆོས་ཚུལ་རྒྱ་མཚོ་ཙམ་བསྒྱུར། ཐོར་བ་བསྡུས། གཅུས་པ་བསྲངས། གཞི་གཏན་ལ་ཕབ། ལམ་ཉམས་འོག་ཏུ་བཅུག ཉན་བཤད་སྒོམ་གསུམ་གྱི་སྒོ་ནས་རྒྱལ་ཁམས་དཀར་འབྱམས་སུ་བཏང་།

 

 ཁྱད་པར་དུ་མདོ་སྒྱུ་སེམས་གསུམ་གྱི་བསྟན་པ་འདི་ཉིད་ལ་དཀྱུས་བཤད་གཞུང་གི་ཆུ་བོ་འགྲེལ་ཊཱིཀ་སྟོང་ཐུན་དང་བཅས་པ། སྙན་བརྒྱུད་གདམས་ངག་གི་ཆུ་བོ་གནད་ཡིག་དམར་ཁྲིད་དང་བཅས་པ། བྱིན་རླབས་དབང་གི་ཆུ་བོ་སྐུར་ཐབས་ངོ་སྤྲོད་དང་བཅས་པ། ཕྱག་བཞེས་ཕྲིན་སྒྲུབ་ཀྱི་ཆུ་བོ་བསྟན་སྲུང་དྲག་སྔགས་དང་བཅས་པ་སྟེ། བཀའ་བབ་ཀྱི་ཆུ་བོ་བཞིར་གྲགས་པ་རྣམས་སློབ་དཔོན་རིན་པོ་ཆེ། པཎ་ཆེན་བི་མ་ལ་མི་ཏྲ། བཻ་རོ་ཙ་ན་སྟེ་བོད་ཡུལ་མདོ་སྔགས་ཀྱི་ཤིང་རྟ་རྣམ་གསུམ་ལས་རིམ་པར་བརྒྱུད་ནས་བོད་ཀྱི་རྗེ་འབངས་ཉེར་ལྔ། ཡེར་པའི་གྲུབ་ཆེན་བརྒྱད་ཅུ། ཆུ་བོ་རིའི་སྒོམ་ཆེན་བརྒྱ་རྩ་བརྒྱད། ཟུར་མེས་དབོན་རྣམ་གསུམ། དམ་གཙང་བྱམས་གསུམ། ཀུན་མཁྱེན་ཡབ་སྲས་སོགས་མཁས་ཤིང་གྲུབ་པའི་སྐྱེས་བུ་བསམ་གྱིས་མི་ཁྱབ་པའི་ཚང་ཆེན་པོ་བརྡོལ་ཏེ། འཕགས་པ་མིག་མི་ཟུམ་པའི་གདུལ་ཞིང་ཕྱོགས་ཀུན་ནས་མཛེས་པར་བྱས་ཤིང་། དེ་ནས་རིམ་གྱིས་བཀའ་གཏེར་གྱི་བརྒྱུད་པའི་ཆུ་བོ་ཆེན་པོ་གཉིས་རྒྱལ་བ་ཀློང་ཆེན་པར་གཅིག་ཏུ་འདྲེས་ཏེ། རྙིང་མའི་གདན་ས་ཆེན་མོ་རྣམས་ཀྱིས་གཙོས་བཤད་པའི་སྡེ་རྣམས་སུ་མདོ་སྒྱུ་སེམས་གསུམ་གྱི་འཆད་ཉན། སྒྲུབ་སྡེ་རྣམས་སུ་བཀའ་གཏེར་གྱི་སྒོམ་སྒྲུབ་ཉམས་ལེན་གྱིས་དུས་འདའ་བའི་སྒོ་ནས་རང་ཅག་རྣམས་ཀྱི་སྐྱབས་མཆོག་བླ་ན་མ་མཆིས་པ་ཞིང་གཤེགས་དམ་པ་རྣམས་དང་། ད་ལྟ་འགྲོ་བའི་མགོན་དཔུང་དུ་འཚོ་ཞིང་གཞེས་པ་རྣམས་ཀྱི་བར་དུ་བུམ་པ་གང་བྱོའི་ཚུལ་དུ་བརྒྱུད་པ་ཟམ་མ་ཆད་པའི་སྒོ་ནས་ཐུགས་ཀྱི་དཔལ་བེའུར་འཁྱིལ་ཏེ། མཐའ་ཀླས་པའི་སྐལ་ལྡན་གྱི་གདུལ་བྱ་རྣམས་སྨིན་གྲོལ་གྱི་ལམ་ནས་དབུགས་དབྱུང་ལེགས་པར་ཐོབ་ཡོད་པ་ནི་སྒྲོ་སྐུར་གྱི་མཐའ་ལས་གྲོལ་བའི་ཆོས་བརྒྱུད་འདིའི་བྱུང་བ་མདོར་བསྡུས་པའོ།།